Ford Mustang ကတော့ ပြီးခဲ့တဲ့ အပတ်တုန်းက ကုမ္ပဏီဘက်က ကြေညာချက်အရ ကမ္ဘာ့ ရောင်းအား အကောင်းဆုံး Sports Coupe အဖြစ် ရပ်တည်နိုင်ခဲ့ ပြန်ပါပြီ။ အခုလို ရပ်တည်နိုင်ခဲ့တာကိုတော့ ၂၀၂၁ အတွင်း စာရင်း ကောက်ယူထားတဲ့ S&P Global Mobility ရဲ့ အချက်အလက် တွေအရ အတည်ပြုထား တာပဲ ဖြစ်ပါတယ်။ ပိုပြီး ထူးခြားတာကတော့ Ford Mustang အနေနဲ့ အခုလို ကမ္ဘာ့ရောင်းအားအကောင်း ဆုံး Sports Coupe ဆိုတဲ့ နေရာမှာ ရပ်တည်နိုင်ခဲ့တာ ၇ နှစ် ဆက်တိုက်ရှိသွားတာပါပဲ။ ဒါပေမယ့် Ford ကတော့ အဆိုပါ ကားကို ၂၀၁၉ နဲ့ ၂၀၂၀ တုန်းက ရပ်တည် နိုင်ခဲ့သလို ရောင်းအား အကောင်းဆုံး Sports ကား ဖြစ်မဖြစ်ဆိုတာတော့ အတည်မပြုပေးထားခဲ့ သေးပါဘူး။
ကမ္ဘာတစ်ဝန်းမှာ ရောင်းအားအကောင်းဆုံးအဖြစ် ရပ်တည်နိုင်ခဲ့ပေမယ့်လည်း အမေရိက ကားဈေးကွက်ထဲ မှာတော့ Ford Mustang တို့က Dodge Challenger ရဲ့ ကျော်တက်ခြင်းကို ခံလိုက်ရပါတယ်။ Dodge အနေနဲ့ ၂၀၂၁ အတွင်း Challenger ကား ပေါင်း ၅၄,၃၁၄ စီး အထိ ရောင်းချခဲ့ ရသလို ယခင်နှစ်ကထက် ၃ ရာခိုင်နှုန်း အထိ ပိုတိုးတက် လာတာပါ။ တစ်ချိန် တည်းမှာပဲ Ford ဘက်ကတော့ Mustang ကား အစီး ရေ ၅၂,၄၁၄ စီး ရောင်း ချခဲ့ရပြီး ၂၀၂၀ နဲ့ ယှဉ်ရင်တော့ ၁၄.၂ % တောင် ပြန်လည် ကျဆင်းခဲ့တာ ဖြစ်ပါတယ်။ တကယ်တော့ အမေရိက ကားအရောင်း သမိုင်း ထဲမှာ ကုမ္ပဏီအတွက် အနိမ့်ဆုံး အထိ ဖြစ်သွားခဲ့တာပါ။ Ford ကတော့ အမေရိက ဈေးကွက် ရောင်းအားက တစ်ကမ္ဘာလုံး ရောင်းအားရဲ့ ၇၆ % အထိ ရှိပြီး တစ်ခြား သော ဈေးကွက်တွေထဲမှာတော့ ရောင်းအားက တိုးတက် လာတာ ဖြစ်တယ်လို့ ရှင်းပြထားပါတယ်။ နယူး ဇီလန် ဈေးကွက်ထဲမှာ ဆိုရင်တော့ ၅၄,၃% ၊ ဘရာဇီး ဈေးကွက် ထဲမှာ ၃၇.၃% နဲ့ တောင်ကိုရီးယား ဈေးကွက်မှာတော့ ၁၆.၆ % လောက် အထိကို တိုးတက် လာတာပဲ ဖြစ်ပါတယ်။ ဒါကြောင့် အခြားသော ကမ္ဘာ့ဈေးကွက်ထဲ ဝယ်ယူလိုအားတွေက မနှစ်ကနဲ့ ယှဉ်ရင် နှစ်ဆလောက် နီးပါးကို တိုးတက် လာတာ ဖြစ် တယ်လို့ Ford က ဆိုထား ပါတယ်။
Coupe တစ်စီး မဟုတ်ပေမယ့် Mustang Mach-E လျှပ်စစ် Crossover ကားအသစ်ကလည်း ၂၀၂၁ ထဲ မှာ ထူးထူးခြားခြား ရောင်းအား ကောင်းခဲ့ပြီး ပထမဆုံး စတင် ထုတ်လုပ်တဲ့ နှစ်မှာတင်ပဲ ၂၇,၁၄၀ စီး အထိ ကို ရောင်းချ ခဲ့ ရတာပါ။ အမေရိကမှာ ဆိုရင် Mach-E က ဒုတိယမြောက် ရောင်းအား အကောင်းဆုံး SUV တစ်စီး တောင် ဖြစ်ခဲ့ပြီး Tesla Model Y အပြီး အကောင်းဆုံး ဖြစ်ခဲ့တာပါ။ ၂၀၂၂ မှာတော့ Mustang ကားတွေကို အဆင့်မြှင့်တင် ပေးရာမှာ အနည်းငယ်လောက်ပဲ သိသာခဲ့ပြီး Ice White ၊ Shelby GT 500 Heritage Edition ၊ California Special ၊ Coastal Limited နဲ့ Stealth တို့လို ထူးခြားတဲ့ Special Edition ကားတွေကိုလည်း မိတ်ဆက် ပေးခဲ့ပါသေးတယ်။ အရောင်တွေ အပိုင်းမှာလည်း ကားသစ်တွေ အတွက် အရောင် ၈ ရောင် အထိ ရွေးချယ်စရာ အသစ်တွေ ထည့်ပေးထားပြီး လာမယ့် ၂၀၂၄ မော်ဒယ် လောက်မှာတော့ လုံးဝ ဒီဇိုင်း ပြောင်းလဲထားမယ့် Redesigned Version အနေနဲ့ ထွက်ပေါ်လာမယ်လို့ မျှော်လင့်ရပါတယ်။
Ref: MotorAuthority