Jeep ရဲ့ ပထမဆုံး လျှပ်စစ်ကားသစ် Avenger ကိုတော့ ကျင်းပလျက်ရှိတဲ့ ၂၀၂၂ ပဲရစ် ကားပြပွဲကြီးမှာ တရားဝင် မိတ်ဆက် လိုက်ပါပြီ။ Avenger ကားကတော့ ဥရောပ ဈေးကွက်ကို အဓိကထား ထုတ်လုပ်ထားတဲ့ Subcompact Crossover အမျိုးအစား ဖြစ်ပြီး ပြီးခဲ့တဲ့ စက်တင်ဘာလတုန်းကမှ ပိုကြီးတဲ့ Recon နဲ့ Wagoneer S Electric SUV တွေနဲ့အတူ အနည်းငယ် ချပြလာခဲ့တာပါ။ အဆိုပါ ကား ၂ စီးကလည်း လာမယ့် ၂၀၂၄ မှာ စတင်ရောင်းချမှာ ဖြစ်ပါတယ်။ အခု မိတ်ဆက်လိုက်တဲ့ Avenger လျှပ်စစ်ကားသစ်တွေကိုတော့ လာမယ့်နှစ် အစောပိုင်းမှာပဲ ဥရောပ ဈေးကွက်မှာစတင် ရောင်းချမှာဖြစ်ပြီး ၁၆၀.၆ လက်မ အရှည်ရှိ တာကြောင့် Jeep Renegade ကားထက် ၆ လက်မ လောက် ပိုတိုတဲ့ ကားဖြစ်လာမှာပါ။
ကားသစ်ကိုတော့ မူလ ကုမ္ပဏီ Stellantis ရဲ့ CMP Modular Platform ပေါ်မှာပဲ အခြေခံ ထုတ်လုပ်ထားပြီး အခု ကား က လျှပ်စစ်ကားဖြစ်ပေမယ့် တစ်ချို့သော ဈေးကွက်တွေထဲမှာတော့ ဂတ်စ်ကားမျိုးကွဲ အနေ နဲ့ ထုတ်လုပ်ပေးလာ ဦးမယ်လို့ Jeep က အတည်ပြုပေးထားပါတယ်။ အဆိုပါ Platform ကိုတော့ DS 3 Crossback နဲ့ Opel Mokka လျှပ်စစ်ကားတွေမှာလည်း အသုံးပြုထားပါတယ်။ ဒါပေမယ့် အခု Avenger အသစ်မှာတော့ 400-V Electrical Architecture အသစ်ကို လျှပ်စစ်မော်တာ တစ်လုံးနဲ့ တွဲဖက်ပြီး Front-Wheel Drive အဖြစ် သီးသန့် ထုတ်လုပ်လာ ခဲ့တာပါ။ ကားရဲ့ မော်တာကနေ 156 hp အထိ အမြင့်ဆုံး စွမ်းဆောင်ပေးနိုင်ပြီး 54-kWh Battery ကြောင့် တစ်ခါ အားသွင်းထားရင် မိုင် ၂၀၀ အထိ မောင်းနိုင်မှာ ဖြစ်ပါတယ်။ ဘက်ထရီ အားသွင်းရာမှာလည်း DC Fast Charger နဲ့ ဆိုရင် ၂၀% ကနေ ၈၀% အထိကို ၂၄ မိနစ်အတွင်း အားပြည့်ဦးမှာပါ။
Front-Wheel Drive အမျိုးအစား တစ်မျိုးတည်း ရပေမယ့်လည်း လမ်းကြမ်း မောင်းကားတွေရဲ့ Overhang အတိုတွေ ၊ ၈ လက်မ အထိ ရှိတဲ့ ကားကိုယ်ထည် အမြင့်ပုံစံတွေအပြင် တောင်တက် Control စနစ်၊ လမ်းမချောစေတဲ့ Selec-Terrain စနစ်တွေက အစထည့်သွင်းပေးထားတာ ဖြစ်ပါတယ်။ Jeep ရဲ့ Entry-Level ကား တစ်စီး ဖြစ်ပေမယ့်လည်း အထင်ကြီးလောက်စရာ အချက်အလက်တစ်ချို့ ပါဝင်လာခဲ့ပြီး ၇ လက်မ ဒါမှမဟုတ် ၁၃ လက်မအရွယ် Digital Cluster နဲ့ ၁၀.၃ လက်မ အရွယ် Infotainment Screen တို့ကပါ Android Auto နဲ့ Apple CarPlay စနစ်တို့နဲ့ တွဲဖက် လာပါတယ်။ ဒါ့အပြင် လမ်းညွှန်စနစ် ၊ အသံနဲ့ ခိုင်းစေနိုင်မယ့် လုပ်ဆောင်ချက် ၊ OTA Update တွေ စသဖြင့်လည်း စုံစုံလင်လင် ရှိလှပါတယ်။ ယာဉ်မောင်းအကူ စနစ်တွေထဲမှာ ဆိုရင်လည်း အရေးပေါ်ဘရိတ် ၊ လမ်းညွှန် ဆိုင်းဘုတ် တွေကို သိနိုင်တဲ့စနစ်နဲ့ Adaptive Cruise Control ၊ Active Lane Control တို့လို လမ်းကြောင်း တစ်ခုထဲမှာ ကားကို ထိန်းပေးထားနိုင်မယ့် လုပ်ဆောင်ချက်တွေလည်း ပါဝင်လာသေးတာ ဖြစ်ပါတယ်။ ကားသစ်တွေကိုတော့ ပိုလန် နိုင်ငံ ၊ Tychy မှာရှိတဲ့ Stellantis ပိုင် စက်ရုံကြီးမှာ တပ်ဆင်ထုတ်လုပ်သွားမှာဖြစ်ပြီး အလားတူ Alfa Romeo ရဲ့ Brennero ကားနဲ့ Redesigned Fiat 500X ကားသစ်တွေကို လာမယ့် နှစ်တွေမှာ အခုစက်ရုံကြီးမှာပဲ ထုတ်လုပ်လာဖို့ ရှိနေပြီပဲ ဖြစ်ပါတယ်။
Ref: MotorAuthority
